國慶日的早上，往西貢嘆完咖啡後，心血來潮兩公婆驅車往將軍澳日出康城首都，感受一下李超人口中令人心曠神怡的風景，兼看看9仟多元9百多呎的超筍租盤。
泊好車後，先由屋苑正門沿長走廊步行往康城地鐵站，行行重行行，嘩！咁遠嘅，十幾分鐘都未到，番工番學豈非好唔方便？而且，按此長廊的設計，半露天部分肯定日曬雨淋。
往睇樓時以之向地產代理查詢，原來屋苑有住客專車來往康城地鐵站。咁，以為該屋苑屬地鐵站上蓋物業，原來由一開始已是美麗的誤會。……
全屋苑共5座，有氣派十足的電梯由地面通往屋苑平台，每座又分左右翼，每翼三梯四伙。當日所見，大堂當值的不是看更阿伯，而是化哂妝的妙齡女郎，的確幾心曠神怡噃！
到達該四個單位中有三個單位放租的樓層，不暗呆了一呆。一百方呎不到的「大堂」，四邊共開了八個門口，每邊兩個。其中四個是單位大門，三個是電梯門，一個是通往另一翼和後樓梯的門。站在「大堂」中央，就仿如置身迷宮或歷險電影的「機關」之中，前後左右都是門，令人很不自在。且每個單位不是對正人家的大門就是對正電梯門，犯哂風水學上的大忌。
代理先打開其中一單位的大門，一陣臭味隨即撲面而來。代理說是上次有人用過廁所，清理後臭味一時未能消散而已。但據通天記者的經驗，臭味應是由動物屍體(大老鼠？)發出來的。
往其它的單位參觀，9百多呎三房，房間都是小小的，主人套房放下四呎床後只放得下一個小衣櫃。其它房間更小，床看來都得佔用部分窗台了。而且全屋的地腳線都特厚，且凸出很多，只量度地磚買床，分分鐘放不下矣！此外，不用仔細驗樓，單肉眼已看到很多問題，包括門框與牆身之間竟有放得下尾指的大罅，蔚為奇觀。
更神奇的竟是全部單位的客廁全建於大門入口旁，且全部無窗！
至於令李超人覺得心曠神怡之處，據聞是位於屋苑某座六十幾樓的極高層。六十幾樓噃，想嗅到垃圾味都幾難矣！且俾得李超人睇嘅，斷估唔會係雙墳景啩！
更離譜者乃收人家每呎2個幾的管理費，樓層「大堂」牆上用來照明的，竟是沒有燈罩的慳電膽。李超人參觀的樓層，又斷估唔會咁啩！
李超人呀李超人，賺錢是應該的，但唔好咁離譜哎！你唔做刻薄嘢，但讓收你幾千萬年薪的手下，代你做埋啲刻薄嘢，也是冇分別的啊！
